राजस्थानच्या कोटा येथील खाजगी कोचिंग इन्स्टिट्यूटमध्ये शिकत असलेल्या तीन किशोरवयीन मुलांनी आत्महत्या (crime) केल्याच्या दोन वेगवेगळ्या घटना समोर आल्या आहेत. नीट आणि जेईई परीक्षांचा अभ्यास करणाऱ्या विद्यार्थ्यांनी गळफास घेत आयुष्याची अखेर केली. यामुळे वैद्यकीय (Medical) किंवा अभियांत्रिकीसारख्या अभ्यासक्रमांच्या प्रवेश परीक्षांमध्ये चांगली कामगिरी करण्यासाठी विद्यार्थ्यांवर असलेला प्रचंड दबाव चर्चेचा विषय ठरत आहे.
कोटाचे पोलिस अधीक्षक केशर सिंह शेखावत यांनी दिलेल्या माहितीनुसार यापैकी दोन विद्यार्थी बिहारचे रहिवासी होते. ते राजस्थानमध्ये एका प्रख्यात कोचिंग संस्थेत शिक्षण घेत होते. ते पेइंग गेस्ट म्हणून राहत असलेल्या निवासस्थानी पंख्याला लटकलेल्या अवस्थेत आढळले. त्यापैकी एक जण १९ वर्षांचा होता, तर दुसरा १८ वर्षांचा होता.
“हे दोघे इयत्ता अकरावीचे विद्यार्थी होते. गेल्या सहा महिन्यांपासून एकाच ठिकाणी पीजी म्हणून वेगवेगळ्या खोल्यांमध्ये राहत होते. ते एकमेकांचे मित्र होते की नाही, हे जाणून घेण्याचा आम्ही प्रयत्न करत आहोत. घरमालकाने पोलिस नियंत्रण कक्षाला कळवल्यावर ही घटना उघडकीस आली” असे शेखावत म्हणाले.
हे वाचा : सात वर्षानंतरही निर्भय पुरस्काराची घोषणा नाहीच, प्रस्ताव कार्यालयात पडून
मृतांपैकी एक विद्यार्थी सकाळी त्याच्या खोलीतून बाहेर आला नाही आणि वारंवार दार ठोठावल्यानंतर त्याने प्रतिसाद दिला नाही. त्यानंतर घरमालकाने दरवाजा तोडला असता तो पंख्याला लटकलेल्या अवस्थेत आढळून आला.
दुपारी दुसऱ्या मुलाची बहीण त्याला भेटायला आली होती. तो पहिल्या मुलाच्या शेजारच्या खोलीत राहत होता. जेव्हा त्यानेही दार उघडले नाही तेव्हा तेदेखील तोडण्यात आले, त्यावेळी तो मुलगा देखील छताच्या पंख्याला लटकलेल्या (crime) अवस्थेत सापडला, असं एसपी शेखावत म्हणाले.
दोघांच्याही मृतदेहाजवळ कोणतीही सुसाईड नोट सापडली नसून अधिक माहिती मिळविण्यासाठी त्यांचे मोबाईल तपासले जात असल्याचे पोलिसांनी सांगितले. दोघे गेल्या तीन वर्षांपासून कोटा येथे राहत होते आणि त्यांनी रात्री जेवण केल्यानंतर आत्महत्या केली असावी. दुसऱ्या मुलाने काल रात्री बहिणीला फोन केला होता, असे पोलिसांनी सांगितले.
दुसऱ्या एका घटनेत, मूळ मध्य प्रदेशातील शिवपुरी येथील रहिवासी असलेल्या १७ वर्षीय विद्यार्थ्याने विषारी द्रव्य प्राशन करून आत्महत्या केली. उपचारादरम्यान त्याचा मृत्यू झाला. पोलिसांनी सांगितले की हा मुलगा वैद्यकीय (Medical) क्षेत्रातील नीट प्रवेश परीक्षेची तयारी करत होता. तो दोन वर्षांपासून कोटा येथे राहत होता.
काल रात्री, तो पीजी म्हणून राहत असलेल्या घराच्या गॅलरीत बेशुद्धावस्थेत सापडला होता. तिथे पाणी भरण्यासाठी आलेल्या एका विद्यार्थ्याने त्याला पाहिले होते. त्याने वसतिगृह मालकाला माहिती दिली. त्यांनी मुलाला रुग्णालयात नेले असता तिथे त्याला मृत घोषित करण्यात आले, असे पोलिसांनी सांगितले. त्याच्याकडे कोणतीही सुसाईड नोट सापडली नाही, परंतु पोलिसांनी त्याच्या खोलीतून उंदीर मारण्याचे औषध जप्त केले आहे.
कोटा येथे 2018 मध्ये 19, 2017 मध्ये 7 आणि 2016 मध्ये 17 विद्यार्थ्यांनी आत्महत्या केल्याची माहिती हिंदुस्तान टाइम्स वृत्तपत्राने दिली आहे.विद्यार्थ्यांच्या आत्महत्यांच्या वाढत्या घटनांच्या पार्श्वभूमीवर राजस्थान सरकारने कोचिंग संस्थांचे नियमन करण्यासाठी विधेयक आणण्याची योजना जाहीर केली आहे. कोचिंग संस्थांना अभियोग्यता (अॅप्टिट्यूड) चाचणीच्या आधारे विद्यार्थ्यांना प्रवेश देणे बंधनकारक असेल, व्यावसायिक अभ्यासक्रमांच्या प्रवेश परीक्षेत चांगली कामगिरी करणाऱ्या विद्यार्थ्यांचे उदात्तीकरण केले जाणार नाही आणि संस्थांच्या हिशेबाचे ऑडिट अनिवार्य करण्याची तरतूद या विधेयकात आहे.
