इंडोनेशियाने पामतेल निर्यातीला हिरवा कंदील दिला आहे. त्यामुळे लवकरच तेथून पामतेलाची आयात सुरू करण्यासाठी खाद्यतेल व्यापारी सज्ज झाले आहेत. सद्यस्थितीत गगनाला भिडलेले खाद्यतेलाचे (edible oil) दर यामुळे स्वस्त होण्याची आशा निर्माण झाली आहे.
भारत हा जगातील सर्वांत मोठा खाद्यतेल आयातदार देश आहे. मसालेदार, चमचमीत व फोडणीवर आधारित खाद्यपदार्थांकडे भारतीयांचा कल असल्याने देशांतर्गत एकूण गरजेच्या ६० ते ६५ टक्के तेल आयात केले जाते. यामध्ये पामतेल सर्वाधिक प्रमाणात आयात (Import) होते. इंडोनेशिया हा जगातील सर्वांत मोठा पामतेल निर्यातदार आहे. त्यामुळेच भारतातदेखील तेथूनच सर्वाधिक प्रमाणात पामतेलाची आयात होते.
एकूण तेल मागणीच्या ६० टक्के पामतेल हे इंडोनेशिया येथून आणले जाते. त्यापाठोपाठ सोयाबीन व सूर्यफुलाच्या तेलाचीही तेथून आयात केली जाते. रेस्तराँ, हॉटेल्स व विविध खाद्यान्न स्टॉल्सधारक पामतेलाचा सर्वाधिक वापर करतात. परंतु इंडोनेशियाने व्यापारी युद्धामुळे मार्चपासून पामतेल निर्यात बंद केली होती. त्यात भर म्हणून रशिया-युक्रेन युद्धामुळे सूर्यफुल तेलाची आयातही रखडली होती.
अखिल भारतीय खाद्यतेल असोसिएशननुसार, भारतात दरवर्षी एकूण मागणीच्या जवळपास ८० टक्के कच्चे तेल आयात करावे लागते. त्यामध्ये १८ ते २२ टक्के सूर्यफुल तेलाचा समावेश असतो. एकूण सूर्यफुल आयातीपैकी ८० टक्के तेल युक्रेनहून आयात (Import) केले जाते.
तर २० टक्के रशियाहून येते. परंतु युद्धामुळे युक्रेनमधून होणारी आयात पूर्णपणे रखडली आहे. तर रशियाने १५ ते २० दिवसातून एक जहाज (सुमारे ६ लाख टन खाद्यतेल) मुंबईच्या बंदराकडे धाडले आहे. या सर्वांच्या परिणामातून खाद्यतेल उच्चांकावर स्थिरावले आहेत. परंतु आता इंडोनेशियाकडून सकारात्मक बातमी आल्याने खाद्यतेलाचे (edible oil) दर घटतील, अशी आशा आहे.
हे वाचा ; IPL Cricket 2022 संपल्यावर विराट कोहली क्रिकेटमधून ब्रेक घेणार?
‘इंडोनेशिया सरकारला तेथील निर्यातदारांच्या दबावाखाली झुकावे लागले होते. निर्यात बंद केल्याचा तेथील स्थानिक व्यापाऱ्यांना फटका बसला. परंतु भारतीय आयातदारांनी याविषयी केलेली चर्चा व मुत्सद्देगिरी यशस्वी ठरली आहे. आता इंडोनेशियाहून २३ मेपासून पामतेलाची आयात सुरू होईल. यामुळे पुढील महिन्यात खाद्यतेलाचे दर कमी होण्यास सुरुवात होईल, अशी आशा आहे,’ असे असोसिएशनचे अध्यक्ष शंकर ठक्कर यांनी सांगितले.
खाद्यतेलाचे (edible oil) दर (रुपये/लिटर)
प्रकार मार्चमध्ये सद्यस्थितीत
पाम १२५-१३५ १४०-१४५
सोयाबीन १४५-१५० १६०-१७५
सूर्यफूल १५५-१६० १८५-१९५
शेंगदाणा १७५-१९५ १९५-२२५
राईसब्रान १४०-१४५ १६०-१७०
