इंडियन प्रीमियर लीग २०२३ (IPL) सुरू होण्यास आता काही दिवस शिल्लक आहेत, तर दिल्ली कॅपिटल्सने अद्याप ऋषभ पंतच्या जागी नवीन कर्णधाराची घोषणा केलेली नाही. मात्र रिपोर्ट्सनुसार एक महत्त्वाची माहिती समोर आली आहे. दिल्ली कॅपिटल्सच्या संघाने ऋषभ पंतच्या जागी संघाची कमान कोणाच्या हाती द्यायची, यासाठीचा पर्याय शोधला आहे.
तर पंतऐवजी डेव्हिड वॉर्नर संघाचे कर्णधारपद भूषवू शकतो. ३६ वर्षीय वॉर्नरला आयपीएलमध्ये कर्णधारपदाचा खूप अनुभव आहे. आता पहिले जेतेपद पटकावण्याचे फ्रँचायझीचे स्वप्न यावेळी पूर्ण होणार की नाही हे पाहणे औत्सुक्याचे असेल.
डेव्हिड वॉर्नर आयपीएल २०२३ मध्ये जखमी ऋषभ पंतच्या जागी दिल्ली कॅपिटल्सचे (IPL) नेतृत्व करेल. मुख्य प्रशिक्षक रिकी पाँटिंग आणि व्यवस्थापनाने याला सहमती दर्शवली आहे. अंतरिम कर्णधारपदासाठी वॉर्नर हा सर्वोच्च पर्याय आहे. डिसेंबरमध्ये एका भीषण कार अपघातातून वाचल्यानंतर पंत हळूहळू बरा होत आहे.
हे वाचा : त्याला सोडू नका, फाशी द्या; चिठ्ठी लिहून कोल्हापुरात तरुणीनं संपवलं आयुष्य
पंतच्या दुखापतीनंतर कॅपिटल्स अंतरिम कर्णधाराच्या शोधात होते. वॉर्नर त्या दावेदारांपैकी एक होता. या दावेदारांच्या शर्यतीत २०२२ मध्ये उपकर्णधार असलेल्या अक्षर पटेलचाही समावेश होता.वॉर्नरने २०१६ मध्ये SRH ला जेतेपद मिळवून दिले होते.
त्याच्या नेतृत्वाखाली सनरायझर्स हैदराबादने विराट कोहलीच्या नेतृत्वाखाली रॉयल चॅलेंजर्स बंगलोरचा पराभव करून विजेतेपद पटकावले होते. तथापि, काळ बदलला आणि त्याच फ्रँचायझीने त्याला संघातून बाहेरचा रस्ता दाखवला. बरं, आयपीएलमध्ये जिंकलेल्या सामन्यांच्या बाबतीत तो आयपीएल इतिहासातील संयुक्त पाचवा सर्वात यशस्वी कर्णधार आहे.
दुसऱ्यांदा संघाचे नेतृत्व करणार
वॉर्नर दिल्ली कॅपिटल्सचे नेतृत्व करण्याची ही दुसरी वेळ असेल. २००९ ते २०१३ दरम्यान फ्रँचायझीसह त्याच्या पहिल्या कार्यकाळाच्या शेवटच्या वर्षात तो काही सामन्यांसाठी अंतरिम कर्णधार होता. वॉर्नरने ४७.३३ च्या सरासरीने २८४० धावा केल्या. ज्यामध्ये १४२.२८ च्या स्ट्राइक रेटसह एक शतक आणि २६ अर्धशतकांसह चा समावेश आहे.
२०२१ च्या आयपीएलच्या (IPL) पहिल्या सहामाहीत त्याच्या खराब फलंदाजीमुळे, सनरायझर्सने त्याला कर्णधारपदावरून काढून टाकले आणि केन विल्यमसनकडे सोपवले. यानंतर वॉर्नर आणि सनरायझर्समध्ये कटुता निर्माण झाली. फ्रँचायझीने त्याला २०२२ च्या मेगा लिलावापूर्वी रिलीज केले, जिथे कॅपिटल्सने त्याला ६.२५ कोटी रुपयांना विकत घेतले.
गेल्या आयपीएलमध्ये वॉर्नरने कॅपिटल्ससाठी ४८ च्या सरासरीने ४३२ धावा आणि पाच अर्धशतकांसह १५०.५२ च्या स्ट्राइक रेटसह सर्वाधिक धावा केल्या. तथापि, मुंबई इंडियन्सविरुद्धच्या अंतिम साखळी सामन्यात हृदयद्रावक पराभवानंतर कॅपिटल्सने प्ले-ऑफमध्ये आपले स्थान गमावले. वॉर्नर सध्या १७ मार्चपासून सुरू होणाऱ्या भारत-ऑस्ट्रेलिया वनडे मालिकेसाठी तयारी करत आहे. याआधी दिल्लीतील दुसऱ्या कसोटीत मोहम्मद शमीच्या चेंडूवर फटका बसल्याने त्याला मायदेशी परतावे लागले होते.
