Twitter युजर्ससाठी मोठी बातमी, एलन मस्कची पुन्हा नवी घोषणा!

ट्विटरचा मालकी हक्क एलोन मस्क यांच्याकडे आल्यापासून रोज काहींना काही घडामोडी घडत आहेत. कर्मचारी कपातीपासून ते ट्विटरमध्ये (Twitter) नवे बदल केले जात आहेत. आता तर बनावट खात्यांमुळे स्थगित करण्यात आलेली ‘ट्विटर ब्लू’  सेवा येत्या 29 नोव्हेंबरला पुन्हा लॉन्च करण्यात येणार होती.  मात्र, आता या सेवेसाठी युजर्संना महिना अखेरपर्यंत वाट पाहावी लागणार आहे.  काही युजर्सने या सेवेचा गैरवापर केल्यानं ही सेवा मागे घेण्याची नामुष्की ट्विटरवर ओढवली आहे.

तसेच या सेवेसाठी पैसे न भरणाऱ्या युजर्सचे ‘ब्लू टिक’ काही महिन्यांमध्ये काढून घेतले जातील, असे एलॉन मस्क  यांनी एका युजरच्या ट्वीटला उत्तर देताना म्हटलं आहे. त्यामुळे ज्या युजर्सकडे सबस्क्रिप्शन सेवेच्या आधीपासून ‘ब्लू टिक’ आहे, त्यांनाही येत्या काळात पैसे भरावे लागणार आहे. व्हेरिफाईड खात्याचं नाव बदलताना ‘ब्लू टिक’ गमवावी लागू शकते, असेही मस्क यांनी म्हटले आहे.

ट्विटरच्या (Twitter) नियमांनुसार नावाची पुष्टी केल्यानंतरच हे नाव बदलता येईल, असंही त्यांनी सांगितले आहे. ट्विटरकडून ‘ब्लू टिक’ पूर्वी राजकारणी, पत्रकार, प्रसिद्ध व्यक्तींच्या व्हेरिफाईड खात्यांना दिली जात होती. मात्र, आता यासाठी सबस्क्रिप्शन सेवा सुरू केल्यानंतर ही टिक कोणालाही वापरता येणं सहज शक्य आहे.

• हे वाचा : जाणून घ्या आजचे राशी भविष्य दि : 22-11-2022

मस्क यांनी सोमवारी सांगितले की, कंपनी वैयक्तिक खात्यांपेक्षा संस्था आणि कंपन्यांसाठी वेगवेगळ्या रंगीत टिक्स वापरू शकते. कंपनी त्यावर काम करत आहे. लवकरच या संदर्भात अधिक माहिती दिली जाणार आहे.मस्कने ट्विटर घेताच पहिली मोठी घोषणा केली ती म्हणजे सशुल्क ब्लू टिक सबस्क्रिप्शनची. परंतु पहिल्या दोन दिवसात लोकांनी या सेवेचा गैरवापर केला. त्यामुळे अनेक प्रसिद्ध कंपन्यांचे कोट्यवधी रुपये बुडाले. यानंतर कंपनीने सशुल्क वर्गणी बंद केली होती.

काही सुरक्षा आणि गोपनीयता धोरणे मजबूत करून 29 नोव्हेंबरला ते पुन्हा लॉन्च केले जाईल असे कंपनीने सांगितले होते. 29 नोव्हेंबरची तारीख खुद्द एलोन मस्क यांनी घोषित केली होती. परंतु ट्विटरच्या (Twitter) समोर या प्लॅनमध्ये अजूनही अनेक सुरक्षेचे प्रश्न असल्यामुळे कंपनीकडून 29 नोव्हेंबरला लॉन्च करण्यात येणार नसल्याची माहिती मस्ककडून देण्यात आली आहे.

एलन मस्कच्या हाती ट्विटरची धुरा आल्यानंतर त्यांनी अनेक बदल केले आहेत. त्यांनी सर्वप्रथम कंपनीच्या सीईओसह अनेक अधिकाऱ्यांना बाहेरचा रस्ता दाखवला. यानंतर त्यांनी अनेक कर्मचाऱ्यांना कामावरून काढून टाकले. त्यानंतर ट्विटर सबस्क्रिप्शनवर आधारित ब्लू टिक बनवले. अशा सर्व बदलांमुळे ते सतत चर्चेत येत आहेत.